கருமையத் தூய்மை
கருமையத்தைக் களங்கப்படுத்தும் செயல்கள் :
கருமையத் தூய்மை
"நிறைவு பெறாமல் இருக்கும் ஆசைகளின் கூட்டம்;
நெஞ்சம், மனம், பேச்சு இடைப் பிணக்காகும் பொய்கள்;
மறைமுகமாய் நேர்முகமாய்ப் பிறர் உளம் வருத்தல்;
மற்ற உயிர் சுதந்திரமும் வாழ்வின் வளம் பறித்தல்;
நிறைவழிக்கும் பொறாமை, சினம், வஞ்சம் இவை காத்தல்;
நெறிபிறழ்ந்த உணவு, உழைப்பு, உறக்கம், உடலுறவு,
கறைப்படுத்தும் எண்ணம் இவை கருமையம்தன்னைக்
களங்கப்படுத்திவிடும் கருத்தோடு சீர்செய்வோம்.''
கருமையத்தைக் களங்கப்படுத்தும் செயல்கள் பின்வருமாறு :
- ஆசைகளின் இருப்பு கூடக் கூட மன அலைச்சுழல் விரைவு அதிகமாகிக் காந்தக் கருமைய ஆற்றலைக் குறைத்து வரும்.
- பொய் சொல்லுதல்.
- பிறர் மனம் வருந்தத்தக்க செயல்களைச் செய்து சாபம் ஏற்றல்.
- பொறாமை, சினம், வஞ்சம் முதலிய குணங்களால் பிறருக்குத் தீங்கிழைக்க நினைத்தல்.
- உணவு, உறக்கம், உழைப்பு, உடலுறவு, எண்ணம் ஆகிய ஐந்தையும், அலட்சி செய்தல், மிகையாக அனுபவித்தல், முரணாக அனுபவித்தல். இதனால் உடல் செல்கள், புலன்கள், உறுப்புகள் கேடுறுதல்.
- உடல் வலிவும் நலமும், கல்வி உயர்வும் நலமும், இருந்தபோதிலும் அதை பயன்படுத்திப் பிறர்க்கு உதவி செய்யாது சோம்பேறியாக இருத்தல், பிறர் வளம் பறித்துண்டு வாழ்தல், பிறர் வாழ்க்கைச் சுதந்திரத்தைப் பறித்தல்.
கருமையத்தைத் தூய்மை செய்யும் செயல்கள்
- தாய்,தந்தை, குரு, ஆட்சித்தலைவர், தெய்வம் இவர்களை மதித்து வாழ்தல்.
- ஒழுக்கம், கடமை, ஈகை என்ற மூன்றுமிணைந்த அறநெறி பின்பற்றி வாழ்தல்.
- மனஓர்மைக்கும், அறிவு விளக்கத்துக்கும் ஏற்ற அகத்தவப் பயிற்சியினை முறையாகச் செய்து வருதல்.
- இரத்தம், வெப்பம், காற்று, உயிர், சீவகாந்தம் ஆகியவை தடையின்றி ஓடி உடலைக் காத்துக் கொள்ள ஏற்ற உடற்பயிற்சிகளை அளவோடு செய்து வருதல்.
- பெற்றோர்கள், வாழ்க்கைத் துணைவர், பெற்ற குழந்தைகள் இவர்களைப் பொறுப் போடும், அக்கறையோடும் காத்து உதவி வருதல்.
- இறைநிலையுணர்ந்து அந்நிலையோடு அடிக்கடி ஒன்றிப் பழகுதல்.
- மனித முயற்சியால் உற்பத்தி செய்த பொருட்களையும், இயற்கை வளத்தையும், பிறர் உபயோகிக்கும் பொருட்களையும் சேதப்படுத்தாது மதித்து நடத்தல்.
- நாம் பார்க்கும் ஒவ்வொருவர் உடலும் இயற்கை என்ற பேராற்றலால் கட்டப் பட்டிருக்கும் பெருமையை உணர்ந்து, உடலுக்குள் அறிவாக விளங்குவது தெய்வத்தின் ஒளியே என்று மதித்து ஒத்தும் உதவியும் வாழ்ந்து வருதல்.
- உள்ளத்தில் பகை, வஞ்சம், எதையும் வைத்துக் கொள்ளாமல் மன்னிப்பும், கருணையும் கொண்டு எல்லோருடனும் இன்முகத்தோடும் அன்போடும் பழகுதல்.
- நாடு, மதம், சாதி, இனம், மொழி இவற்றால் மனிதரை வேறுபடுத்திக் காணாமல் எல்லோரும் இயற்கையின் மக்கள் என்ற நினைவில் வாழ்தல்.
Post a Comment